Azərbaycan Respublikasının qanunvericiliyi ilə qadağan edilməyən ictimai faydalı fəaliyyət sahəsində işlərin görülməsi və ya xidmətlərin göstərilməsi ilə məşğul olan, istənilən hüquqi və fiziki şəxslərin, fərdi və ya qrup şəklində, öz iradəsi və sərbəst seçimi əsasında, əvəzi ödənilməyən (əmək haqqı, bonus, xidmət haqqı) və heç bir maddi (kommersiya) marağı olmayan şəxs.

Azərbaycan Respublikasının qanunvericiliyi ilə qadağan edilməyən işlərin görülməsi və ya xidmətlərin göstərilməsi ilə: əlilliyi olan şəxslərə, kimsəsizlərə, ahıllara, aztəminatlı ailələrə, qaçqınlara və məcburi köçkünlərə kömək edilməsi; insanpərvərliyin və dözümlülüyün təbliği; uşaq və gənclərin təhsili, tərbiyəsi, fiziki və əqli inkişafı; xəstəliklər və epidemiyalar barədə məlumatlandırma; sağlam həyat tərzinin təbliği; ətraf mühitin mühafizəsi; silahlı münaqişələr, təbii fəlakətlər, sənaye qəzaları, yanğınlar, epidemiyalar və digər fövqəladə halların nəticələrinin aradan qaldırılmasına, o cümlədən fövqəladə hallar nəticəsində zərər çəkmiş şəxslərə yardım göstərilməsi; cəzaçəkmə müəssisələrindən azad edilən, narkotik asılılığına düçar olan, məişət zorakılığına məruz qalan şəxslərə və “Sosial xidmət haqqında” Azərbaycan Respublikasının Qanununa uyğun olaraq çətin həyat şəraiti yaşayan digər şəxslərə (ailələrə) kömək edilməsi; Azərbaycan Respublikası qanunvericiliyinin tələblərinə zidd olmayan digər fəaliyyət sahələri.

Bizim könüllülərimiz fərqli-fərqli ictimai faydalı fəaliyyət sahəsində fəaliyyət göstərir, lakin əsas istiqamətlərdən bunları qeyd edə bilərik: Yaşlılara qayğı, Məlumatların toplanması, Sorğuların keçirilməsi, Təlimlərin keçirilməsi, Ünvanlı yardımın çatdırılması və ofis daxilində administrativ xidmət

Bizim könüllülərdən birisi olduğunuz halda siz ictimai faydalı fəaliyyət göstərməklə və əhaliyə kömək etməklə yanaşı: pulsuz təlimlərdə və ödənişli ezamiyyətlərdə iştirak edib, xüsusi təyinatlı bilikləri əldə edib, iş təcrübəsi qazana bilərsiniz. Həmçinin bizim könüllülərimizə mütəmadi olaraq fərqli sertifikatlar və xüsusi hallarda isə digər növ təltiflər verilə bilər.